Il pled da l'onn represchenta svilups socials essenzials che sa manifesteschan en ils discurs da la Svizra. In team da perscrutaziun dal Departament da linguistica applitgada da la Scola auta turitgaisa per scienzas (ZHAW) eruescha ensemen cun la Lia Rumantscha (l’uniun tetgala da tut las persunas ed organisaziuns linguisticas rumantschas), il Pled svizzer da l'onn per vegnir a savair co che la Svizra patratga – en tut las quatter linguas naziunalas.

L'elecziun ha lieu a moda plurilingua, sa basa sin la perscrutaziun ed è interactiva:

Dal 2003 fin il 2016 ha il «Biro dal pled da l'onn» tschernì mintg'onn il pled da l'onn per la Svizra en tudestg. Dapi il 2017 eruescha in team da perscrutadras e perscrutaders da la ZHAW il pled da l'onn tudestg e franzos, dapi il 2018 il talian. A partir dal 2019 è vegnì vitiers il pled da l’onn rumantsch, il qual vegn tschernì en collavuraziun cun la Lia Rumantscha.

Mintga lingua tscherna il pled via trais stgalims:

1. L'emprim analiseschan las perscrutadras ed ils perscrutaders la banca da datas da la ZHAW «Korpus swiss-AL» e defineschan ventg pleds ch'èn vegnids duvrads l'onn current pli savens ch'ils onns precedents.
2. Suenter tscherna ina giuria da profis da lingua ils trais pleds ils pli marcants da questa glista, da propostas dal public e sin fundament d'atgnas experientschas.
3. La finala mussan las perscrutadras ed ils perscrutaders cun istorgias da pleds co che questas noziuns èn sa sviluppadas l'ultim onn areguard il diever linguistic en Svizra e tge midadas socialas ch'els represchentan.

La ZHAW ramassa datas davart il discurs svizzer sco era propostas ch'ins po trametter fin ils 24 da november via ils suandants chanals:

#pledrumantsch
pled-da-l-onn.linguistica@zhaw.ch

#WortdesJahresCH
wort-des-jahres.linguistik@zhaw.ch

#MotDeLAnnéeCH
mot-de-l-annee.linguistique@zhaw.ch

#ParolaDellAnnoCH
parola-dell-anno.linguistica@zhaw.ch

Davart novitads infurmain nus regularmain sin questa pagina e via noss account da twitter @ZHAW_Linguistik.